الفن والذكاء الاصطناعي، معركة القدرات غير المتكافئة

غالبا هاد الايام وانت تتصفح مواقع التواصل الاجتماعي وفايسبوك على الخصوص، كل مرة كتفاجأ بالكم الهائل لي عرفو تطور مجال الذكاء الاصطناعي وخصوصا منصة ChatGPT لشركة OpenAi، وكيفاش هاذ التطور جاب معاه بزاف التخوفات من طرف الفنانين في جميع المجالات، وخصوصا في مجال الصورة والرسم والديزاين، وحتى الموسيقى وتقريبا گاع الفنون.

واش الذكاء الاصطناعي كيهدد الخدمة ديال الناس ؟ غالبا هذا هو السؤال لي كيتطرح ديما، سواء كنتي مهتم بهاد المجال، عاجبك او باغي تكتاشفو. غي هو لحسن الحظ، انه ماشي أول مرة في التاريخ كيكون عند الانسان هاد التخوف الطبيعي، المنطقي والواقعي، حيت كل مرة هاد الانسان هو نيت كيخترع شي أداة، شي تكنولوجيا جديدة، شي حاجة لي غتبدل العالم، وتعاون التطور ديالو، ديما كيتصدم بأول عائق، لي هو الانسان نيت براسو واخا اكون باغي الخير والرفاهية للانسانية جمعاء. السؤال الجوهري الان، هو اشنو الواحد اقدر ادير فخضم هاد التطور ؟ والجواب على هاد السؤال بكل بساطة هو اه كيهدد الخدمة ديال بعض الناس، وفي نفس الوقت لا..

فمثلا الا رجعنا التاريخ غادي لقاو انه بزاف الحوايج لي عندك مجموعين دابا في تيليفونك وعندك امكانية الوصول ليهم في ثواني، بحال الالة الحاسبة او الساعة، او الكاميرا، تسجيل الصوت، وبزاف الادوات كانو في الماضي القريب من المستحيل اتجمعو في بلاصة وحدة. ونهار تختارع الهاتف الذكي، كانت نفس الهدرة والتخوفات، ولكن وفي هاد العصر باقي لي كستخدم الساعة اليدوية، وعندو فقط الة حاسبة، وكاميرا احترافية، وكل حاجة كتدير خدمتها في اطارها.

ورجوعا للكاميرا، راه كان نفس التخوف بالنسبة للرسامين، نهار شافوها انها بكل بساطة قادرة تنسخ المنظر للقدامهم في دقائق معدودة، وأمثلة كثيرة من التاريخ. ما يهمنا الان وهنا، وخصوصا الانسان المغربي، هو انه اكون قادر على مواكبة هاد التطور ومسايرته، وتحول من مجرد متفرج او مستهلك الى منتج واعي يساهم فهاد التطور بشكل او باخر، في معركة اليوم ماشي هي واش الذكاء الاصطناعي احسن منا، ولكن في ضبط وفهم اليات التعامل معاه، والتفاعل معه، وتعلم كيفية التواصل معه، وهاد الخطوة كتبدا اول باللغة، وكنقصد هنا اللغة الانجليزية وباقي لغات البرمجة، لي خاصو اكونو أساسيين في تكوين ديالنا وليس ترف او خيار ثانوي.

 ويجب الا نحصر استعمالات الذكاء الاصطناعي في مهام بليدة عقيمة غي باش نغطيو على العگز ديالنا، لانه واخا اعطيك گاع المعلومات لي بغيتي بطريقة منظمة وجميلة، خاص على الاقل اكون عندك الاساسيات ديال التحليل واللغة، باش تفرق وتدقق صحة المعلومات لي اعطاك، لانه دوره يقتصر فقط في التجميع واضافة اشياء جديدة امكن تكون غير صحيحة بالمرة، ولكن اجتهاد منو باش اعطيك نتائج مبهرة، وهذا تخوف اخر تاني ومعضلة خطيرة. لانه مايمكنش تخلي الذكاء الاصطناعي اطلق العنان لراسو، وانت تبقى غي متفرج لاغير كتزودو بالعلومات لي بغى، وهنا خاصك تطرح السؤال، شكون كيتحكم في شكون ؟

التخوف المنطقي الآخر وهو قضية الحقوق المؤلف والحقوق المجاورة، فمثلا عندما كتصايب صورة بالذكاء الاصطناعي عن طريق MidJourney ولا Bing Ai، شكون هو الطرف لي كيضمن الحقوق لهاد المنتج لي اخرج جديد، سواء كانت صورة ولا رسم ولا ديزاين ولا موسيقى، واش الذكاء الاصطناعي براسو ولا الشخص لي دار عملية الصنع او الابداع، اذن شكون الفنان فهاد الحالة، واش الذكاء الاصطناعي ولا لي خدمو اخرج ديك النتيجة، مع العلم ان تقنية الذكاء الاصطناعي تشتغل عن طريق تجميع المعطيات والمعلومات من قاعدة البيانات لي كاين في الانترنيت، اذن هاذ الذكاء الاصطناعي ماكيجيب تا حاجة من راسو بل كيعتامد على صور كاينة باش انتج لينا شي حاجة جديدة او تقريبية للعمل الاصلي، اذن هنا شكون كيحمي جهد الفنان الاولي لي تستعمل الفن ديالو بدون الإذن ديالو، وفين هي حدود الاستلهام باش نضمنو على اقل شي تعويض مادي او معنوي.

في الموسيقى كذلك كاين هاد المشكل، لانه صناعة الموسيقى الجديدة ولات كتعتامد على خوارزميات محددة لي
كتعطي الذكاء الاصطناعي امكانية الابداع بكل حرية، اذخال اصوات ديال فنانيين مشهورين، بحال Drake ولا Paul McCartney ديال Beatles. من هنا لقدام غادي نوليو نسمعو نسخ منمقة ديال اغاني قديمة تم تجديدها بفضل هاد التقنية ديال اعادة انتاج الاصوات البشرية بكل الدقة، وبحال والو نسمع البومات جديدة ديال Michael Jackson ولا Amy Winehouse تم انتاجهم وتوزيعهم. ولا غادين في طريق أخرى أكثر غرابة، هي الفنان الحقيقي كذات والمقابل ديالو بالذكاء الاصطناعي، فمثلا تقدر تلقى Metallica ضد Metallica AI في Spotify وانت حدد لاش بغيتي تسمع، وبعد المرات نسخة الذكاء الاصطناعي امكن تكون احسن من العمل الأصلي بدرجات.

داكشي علاش في السنوات القادمة خاصنا نتوقعوا تغييرات في الصناعات الثقافية الفنية والموسيقية، كيفما وقع في بدايات الالفية مني الكاسيط وأجهزة التشغيل والتسجيل مابقى عندها تا دور مني دخل الانترنيت وجاب معاه ثقافة الاستماع والتحميل من المواقع او التشغيل الاني، والولوج الموسيقى والمشاركة ديالها اصبح في يد الجميع. هنا جات شركات الانتاج والتوزيع بخطط واستراتيجيات جديدة من اجل الربح.

هادشي كامل لي ذكرناه نسبيا امكن اكون عندو حلول في المستقبل، لكن الخطير في الأمر هو الاستعمالات ديال الذكاء الاصطناعي في السباق نحو التسلح، والاستعمالات ديالو في الحروب والصراعات بحال الصناعات النووية وباقي الأسلحة الفتاكة.. لانه لحد كتابة هاد الأسطر باقي ماكاين تا شي هيئة في العالم بحال الامم المتحدة مثلا لي كتقنن او تنظم هاد المجال عن طريق قوانين او اخلاقيات هاد الاستعمالات، الابحاث كل يوم كتطور وهادشي مزيان، الذكاء الاصطناعي هو نعمة وثورة في العالم ديالنا، اكيد خاصنا نستافدو منو ولكن بأي ثمن، حيت الإنسان على مر التاريخ دائما كيعيش هاد التغيرات، والنقاش الان ماشي شكون غادي إحتفظ بالخدمة ديالو او العكس وانما اعمق واعقد… وبطبيعية الحال تا انا استغليت الفرصة وطرحت نفس هاد السؤال على ChatGPT، وكان هذا هو الجواب بدون زيادة او نقصان؛

تحديداً، يمكن القول إن الذكاء الاصطناعي يشكل تحديًا كبيرًا أمام الفنانين، إذ يجعل من السهل إنشاء أعمال فنية عن
طريق الحواسيب والبرامج، وهذا يعني أن الفنانين يجب أن يتكيفوا مع هذا التطور السريع ويجدوا طرقاً للتعامل مع هذه القدرات المتفوقة. ومن الجانب الآخر، يمكن أن يكون الذكاء الاصطناعي والتكنولوجيا مساعدًا كبيرًا للفنانين، حيث يمكن استخدامها لإنشاء أعمال فنية مبتكرة وجديدة، وإتاحة المزيد من الفرص للتعبير عن الإبداع.

ولكن، يجب على الفنانين العمل على تطوير مهاراتهم والابتكار والتجديد، لتمييز أعمالهم عن تلك التي يمكن إنشاؤها بسهولة باستخدام الذكاء الاصطناعي. وعليهم أيضًا أن يفهموا كيف يعمل الذكاء الاصطناعي ويستفيدوا من قدراته لتحسين عملهم، بدلاً من محاولة منافسته. بشكل عام، يمكن القول إن الفنانين قادرون على مواكبة التطورات الحديثة في مجال الذكاء الاصطناعي، وذلك من خلال الاستفادة منها وتوظيفها لصالح الإبداع والفن.